Lalruatkima chuan Dampa bial mipuite hian MNF official candidate Dr R Lalthangliana an thlan tlin ngei kan duhsak, a ti a, Dr. Thangtea an thlan tlin a ṭulna chhan a tarlang bawk.

1. Tawnhriat tam tak nei tawh, mithiam a ni a. State sum mai ni lovin Central fund nena ṭawngkawpa development sawichhuak thei tur, development bulldozer a ni tih kan hriat kha. 

2. ZPM sorkar buai tak, ram kaihhruaina kawnga kal ngaihna hre lo tak hian thurawn petu leh khalh ngiltu ṭha an mamawh hle a.  Dr Thangtea hi Opposition MLA ṭha tak leh sorkar finchhuahtu ṭha tak a ni dawn a ni.

3. ZPM sorkar kal dan duhkhawp awm lo tak en hian kum 2028 inthlanah chuan Pathian leh mipui zarah MNF-in sorkarna a chang leh dawn tih a chiang a. MNF arsi lian Dampa mipuiin MLA-a an neih hi a pawimawhin Dampa bial tan kawng hrang hrangin an hlawkpui hle dawn a ni.  

4. ZPM sorkar hian ram leh hnam himna an ngaihsak lo hle a. He sorkar-ah hian Nationalism-in kalsan leh ngaihthah a hlawh a. Kan hnam a him lo a ni. Nationalism tung ding leh tur hian MNF arsi lian hi House-ah a ṭhut a ṭul tak zet a ni.  

MNF Treasurer chuan, Campaign chhungin ṭhahnem ngaih luat vangin bial chhung mipuite rilru tina zawnga ṭawng leh chetna kan nei palh thei a, chutiang alo awm a nih chuan an mi hriatthiamna kan ngen tak meuh, a ti a. 

“MNF Campaigner te duhsak tak leh thahnem ngai taka min lo dawnsawnnaah Dampa bial mipuite chungah thinlung takin lawmthu kan sawi tak meuh a. Kan campaign chhung zawnga min hruai a, min venghim tlattu Pathian chungah lawmthu kan sawi tak meuh meuh bawk a ni” Minister hlui chuan a ti.

Lalruatkima chuan, “Tlin duh luat avangin sawrkar lai, ZPM Party hotute chuan dan dinglaite pawisa hauh lovin, an bawhchhe rem rum a. An insawifiahna te pawh ECI lamin an pawmsak lo tih hriat a ni a. A pawi tak zet a. Hei hian pi leh pute thuvawn 'Lal ngailo an lal a na, an lal a kha' tih kha a tichiang hle a ni. Hetianga ZPM-te an chet laia MNF campaigner-teah sawisel tur a awm ve lo hi a lawmawm kan ti hle,” a ti bawk.

MNF Candidate-in hnehna a chan ngei theihna atana theihtawp chhuah a, tha leh zung sengtute chungah lawmthu kan sawi a. Hei bakah hian ṭawngtaina nena kiltin aṭanga min beihpuitute chungah lawmthu kan sawi tak meuh meuh a ni, tiin a tarlang.

Candidate ṭha tak tak karah MNF-in Official Candidate Dr. R. Lalthangliana kan nei hi lawmawm kan ti a. A inpekna, taimakna leh remhriatnate fakawm kan tiin, inphahhniam taka mipui khawngaihna dila malsawm tlakah a khawsakna hian hlawhtlinna a thlen ngei kan beisei tlat a. Hnehna a chan ngei pawh kan beisei a ni, a ti.

MNF Treasurer chuan, Inthlanna muanawm leh felfai tak neih a nihna tura thawktute rim taka inpekna a fakawm kan tiin, tluang taka inthlan a nih ngei kan beisei a. Thuneihna leh chakna hmansual avanga harsatna leh sawisel ngai thleng chhunzawm tawh lo turah MNF chuan kan beisei a. Dik tak leh tha taka dan leh thupekte pawh kenkawh a nih kan beiseiin, mipuite pawhin kan zawm tlan theuh kan beisei tak meuh a ni, a ti.

“Dampa bial mipuite vote thlak vek turin kan sawmin kan ngen a. MNF official Candidate Dr R Lalthangliana vote ṭheuh turin Dampa bial mipui zawng zawngte thinlung takin kan ngen a. A chhinchhiahna chu ARSI a ni” tiin.